هل اتقان اللغة اهم حاجة للتورليدر او الجايد فى الشغل؟

شرم الشيح 

 هل اتقان اللغة اهم حاجة للتورليدر او الجايد فى الشغل؟

من اهم الاسئلة اللى ممكن تفكر فيها لو عاوز تشتغل فى مجال السياحة و بالذات لو كنت هتتعامل مع الزبون - السائح- دايركت زى مثلا استقبال فى المطار او تسفير اومندوب جوا المطار - علشان تراجع ليستة الطيارة و تعر مين نو شو او جو شو - او مندوب  رحلات او .هوتيل جايد علشان تبيع الرحلات للشركة والخ الخ الخ 

طبعا الكل هيفتكر انك لازم تكون متقن للغة اتقان تام علشان تكون تورليدر كويس و يفتكر ان مهارة اللغة هى الحاجة الوحيدة اللى ممكن تنجحك فى الشغل مع العلم و الواقع عكس كدا و بيفرق من  ترانسفير لتورليدر لهوتيل جايد 

يعنى اية الكلام دا ؟

يعنى بالنسبة للترانسفير مان اللغة مطلوبة و لكن مش بقوة و الاهم انة يكون عارف البلد كويس جدا جدا لانة فى الشغل هيتسال كتير عن الاماكان و الوقت و هنوصل الفندق بعد قد اية ؟ ربع ساعة ؟ و لو انت كترنسفير مش عارف فين الفندق هيبان عليك و انت مع الزباين فى الاتوبيس او فى اهاى اس او فى الكوستر ايا كان - الزبون هيحس انك لسه جديد و انت بتسال السواق و مش عارف الطريق و  بالتالى اللغة هنا مش هتفيدك اوى - خلى بالك 

وهتتعامل ازى لو زبون سكران فى الاتوبيس او زبون ضاعت منة حاجة او نسى حاجة فى الفندق او اتاخر عليك فى السفر حاجات  و ازاى تتعامل مع سوق السياحة و حاجات كتيير اوى اوى هنتكلم عنها 

 بردو انت لو كنت تورليدر و فى رحلة بحر او رحلة سفارى و مش عارف مصطلحات اللغة الخاصة بالرحلة او مش حافظ السبيتش
 بتاع الرحلة او الاسطمبة من الاخر كدا مش مهم تكون انك فاهم و متقن لغة و لا لا ؟ لان انت فى كل مرحلة من مراحل الرحلة فى معلومات لازم تقولهاو الزبون طالع علشان كدا - زى مثلا  و انت فى رحلة بحر بتحكى بريفينج عن الرحلة و هنروح فين و الغدا امتى وكام وقفة معانا فى البحر نستريح و هناكل فى الوقفة الاولى و لا التانية و بالنسبة لايجار المعدات والخ و الخ 

و بالنسبة للهوتيل جايد و هو اللى بيكون موجود مع كل الجست فى الفندق خلال اليوم و بيعمل معاهم ميتنج طبعا لازم اللغة تكون قوية لانة بيقابل مواقف كتيرة مع الزباين منهم اللى بيشتكى من الغرف و الفنق و منهم اللى بيفاصل فى الرحلة و بيسال فيها و منهم اللى عاوز يغير التيكت الطيران و يسافر بدرى او يكمل اسبوع تانى - من الاخر كدا الهوتيل جايد بيكون اكتر واحد من المفروض يتقن اللغة 

مش بقول انها ملهاش ازمة بس التركيز على اللغة كويس و لكنة مش العامل الوحيد لنجاح الشخص او لا ؟ و لان الزبون مش هيتكلم معاك و يتناقش فى اجمالى الناتج المحلى المصرى و مقارنة بالناتج المحلى الروسى او حتى عن المؤشرات الاقتصادية المصرية و مارنتها بالعام الماضى !!!!!!!!!!!!؟  هو مهتم بالسياحة اغلب الكلام بيكون فى مواضيع معينة و مكررة و نادرا لما الحوار بينك و بين الزبون يطلع عن النطاق المعروف 

بالنسبة للجات مان اللى بيكون واقف على جيت المطار و بيوجة الزباين لارقام الاتوبيسات و معرفة فين البارك بتاع اتوبسات الشركة _ اغلب كلامة عن ازاى يقدر الزبون يروح ويلاقى الاتوبيس بتاعة و البارك على اليمين او الشمال و لون الاتوبيس و مالى اخرة 

و بالنسبة للصاين مان بيكون واقف فى نص المطار قدام البارك و قدام بوابة الجيت المطار و بيتاكد الزباين رايحة فى البارك الصح  علشان زباين شركة متتهش و تروح شركة تانية فى بارك تانى و ندور عليهم  

و بالنسبة للترانسفير - بيكون عادة الجايت مان او الصاين مان -  بيكون عارف الشغل بتاعة بالنسبة للوصول انة عارف العدد معاة كام واحد و السن و الجنسية و عدد الفنادق اللى هيسكن يها و بيكون مظبط مع السواق اول و اخر و ترتيب الفنادق و كل حاجة فى الترانسفيرة 

و بالنسبة للتورجايد بيكون عارف العدد و بيكون بيجمع للرحلة و لا هو اللى هينفذ الرحلة و كمان بيكون حافظ السبيتش الخاص بالرحلة و مش بتون تلقائى و مش عفوى - يعنى من الاخر الموضوع بيكون اغلبة و مش كلة حفظ - و الهم انك تكون تورليدر يقدر ينجح الرحلة الفاشلة من اول الجو قلب فى البحر او فى السفارى واحد اتصاب هتعمل اية ؟ انت اخدت دورت اسعافات اولية ؟ تقدر تسعف
الزبون و خلى بالك ساعتها الزبون هيقدرك جدا معنويا و ماديا لما يشوفك تقدر تتعامل فى المواف دى ؟

مش معنى كدا ان اللغة مش مهمة - هى مهمة جدا و لكن مش هى الوحيدة اللى بيقوم عليها نجاح الرحلة او لا - الزبون محتاج يستمتع بالرحلة مش جاى يعملك امتحان لغة - و اللغة دى اللغة التانية ليك او التالتة كمان - يعنى الزبون بيقدر كدا و بيفهمك - بس على الاقل يكون مستواك متوسط على الاقل .

لو حابب تعرف اكتر عن دورة الاسعافات الاولية ممكن تسوف الموضوع دا 

الاسعافات الاولية و أهميتها للتورليدر و التورجايد

بالنسبة للهوتيل جايد هو اكتر  واحد محتاج اتقان اللغة اتقان تام لانة بيعمل المييتنج مع الزباين و بيفرز مين اول مرة او تانى مرة او

 المرة ال20 زيارة و بيعرف يبيع و لو الزبون شاف ان الهوتيل جايد متقن ساعتها بيطمن و طبعا الهوتيل جايد فى الغالب بيكون فى الاول تورليدر علشان لما يبيع رحلة بيكون فاهمها و يقدر يعمل بريفنج عنها 

و علشان تتاكد ان القصة مش لغة بس - اغلب شركات السياحة بتحب ان الهوتيل جايد يكون مصرى مش اجنبى و شركات كتيير بتحاول تخلى الهوتيل جايد مصرى مش اجنبى  مش بسبب الراتب بالعكس دا بسبب البيع - مهاة تانية خالص - لان لو الموضوع لغة و بس كان ابن بلدهم احسن واحد - تلاقى فر شرم اغلب الهوتيل جايد مصريين و الانفورماتير - اللى بيعملو سيتى تور علشان تشترى جلود اجانب - لكن الهوتيل جايد مصرى لانة معاة مهارة البيع اكتر من الروسى - و الروسى اعلى فى اللغة من امصرى لانها لغتة الام .

بالنسبة لمندوب المطار و هو مندوب الشركة اللى بيكون معاة كارنية المطارات و دا شغلة جوا المطار بيكون كلامة اغلبة فى تاخير الطيارة او عدد الكيلوهات للشنط او ممكن اسافر بالشيشة او لا او المانجو كام كيلو و لو فى حد عرض على الامن العام مش هيطلع و لو فى حد نو شو و الطيارة هتجلية او جو شو وزيادة و المكتب نايم مبلغش بالشغل الجديد ,على حسب و كل واحد فى مجالة فى سبيتش بيتعاد كتير 

بالنسبة للاوبريشن فى شركات السياحة عادة مش محتاج اوى اللغة التانية ,كفاية انجليزى ايميلات و شكرا على كدا و اخرة بيكون شغال على جونيبر _ سيستم لادراة شركات السياحة _مثلا و يشوف الفوتشرات و التسكين و ياكد على النو شو و الجو شو - من الاخر اتقان اللغة مش اساسى و لكن اضافى - انا بتكلم مثلا عن شركات السياحة الروسية مثلا فى شرم الشيخ .

بالنسبة للريسيبشن  برضو مش محتاج يكون بيتحدث بطلافة و الموضوع بيكون داخل مجال الفندقة يعنى الزيون هيسال على الفوطة او الغرفة مش نضيقة او على درجة الغرفة ديلوكس او استنادرد اوسى فيو او جاردن فيو - 

الخلاصة :

اشتغل على نفسك فى اللغة بس افهم المجال صح 

افهم لو كنت ترانسفير اية هى واجباتك و التزاماتك علشان متجليش شغل  و لو كنت تورليدر لازم تكون مسيطر على المركب و الريس  وتعرف تتعامل معاهم 

و لو كنت هوتيل جايد قوى نفسك اكتر و اكتر فى اللغة علشان الكوميشن و شوف اكتر من طريقة بيع لان كل زبون و لية طريقة بيع _ فى زبون لازم تخوفة علشان يشترى _تخوفة من الشرا من الشارع اللى هو الخارتجية مثلا _ و فى زبون تانى ريتش و نضيف مش محتاج تخوفة و لكن محتاج سيرفيس اقوى و للدرجة انى ساعات الهوتيل جايد يختار تورليدر معين علشان يطلع مع الزبين بتوعة لانة عارف انة هيقدر ينجح الرحلة 

و من هنا طور من نفسك و هتلاقى مع الممارسة الدنيا تمام  B1الحد الادنى من اللغة بيكون 

متفرحش انك تكون مساعد هوتيل جايد بسرعة علشان هياثر عليك قدام لما تكير _ دوس فى الرحلات على قد ما تقدر كلها من اول البحر للسفارى للدولفين و كل انواع السفر من اول دهب او نويبع علشان لما ربنا يكرمك و تكون هوتيل جايد تكون فاهم الدنيا ماشية ازاى .

الفرصة بتيجى لكل واحد اجتهد _ كان الاول الشركات تطلب خريج السن او ليسانس لغة بس و لكن لما الدنيا فتحت فى الروسى كان فى شغل كتيير و مفيش ناس و بعد كدا اللى اتعلم لغة من المركز الثقافى و اتحان بسيط معاهم فى الشركة يتعين _ اللى عاوز اقولة متسمعش كلام حد يياسك علشان انت مش خريج كلية لغات _ اعمل اللى عليك و بس _ ربنا بيكرم كل مجتهد