انت كمندوب ازاى تتعامل مع سواق السياحة فى الترانسفير او الرحلة !

 انت كمندوب  ازاى تتعامل مع سواق السياحة فى الترانسفير او الرحلة

الموضوع دا من اهم المواضيع فى السياحة ان مكنش الاهم  علشان ممكن يريحك فى الشغل او يتعبك جدا على الفاضى علشان انت مش فاهم ازاى تتعامل مع اكترالسواين صح 

فى الاول كدا لازم نفرق نوعين من السواقين 

سواق الشركة ذات نفسها اللى انت شغال فيها 

و سواق السبلاير 

و كمان لازم تفرق ازاى تتعامل مع سواق كبير فى السن او فى سنك و لو متعلم او مش متعلم و لو سواق خبرة كبيرة فى البلد او لا

و كمان لازم تعرف ان السةاقين بيتكلمو مع بعض و الموضوع مش زى ما انت فاهم انك انت القائد الوحيد فى الترانسفيرة او الرحلة 

فى اساسيات كدا تتعامل بيها مع الكل و اهمها احترم السواق و عدم التقليل منة . لان اغلب سواقين شرم او الغرقة بيكونو خبرة فى المجال اكتر منك و كمان عايشين فى البلد قبل ما انت تدخلها  و ساعات بيشيل شغل فلا وقت الزنقة و يعمل ترانسفيرة السفر لوحدة لو الشركة طلبت منة 

اللى عاوز اقولة  بلاش تتعامل معاهم بتناكة او بتعالى و افهم ان انت و السواق هتتقابلو كتيير جدا و فى وش بعض كتيير انت محتاجة و هو محتاجك  يعنى من الاخر العلاقة ما هى الا علاقة نفعية و تبادلية .

انت محتاج السواق يريحك فى الشغل و المواعيد وكمان يكون خايف على التشغيلة و تخلية هو اللى عاوز يساعدك و هو محتاجك فى حاجات كتيير لانك ممكن تنجز بسرعة الشغل و تخلص بدرى وتريحة انة ياخد راحة و مترخمش علية فى الشغل او المواعيد او من الاخركدا تشتغل ميرى و كمان هو محتاجك لو عاوز يغير عملة  الروبل او التينجة او الجريفن من الزبون لانةمش عارف يكلم 

بس خلى بالك السواقين من خبرة الشغل و المشواير بيعرف انت تمام فى اللغة و لا لا و كمان بيعرف شوية روسى او شوية لغة من
الجست اللى شغال علية علشان  يظبط حالة 

لو حابب تعرف اهمية اللغة فى الشغل للترانسفير او التورجايد اقرا الموضوع دا 

هل اتقان اللغة اهم حاجة للتورليدر او الجايد فى الشغل؟

فى فرق بينك و بين السواق اولا فى الراتب . انت راتبك بيكون اضعاف راتبة و كمان انت بيكون ليك سكن محترم او بدل عالى و كمان انت  ممكن تدخل الفندق تاكل فى مطع الجست مش مطعم الاستف و كمان اجازاتك احسن و كمان التصاريح اللى من غرة السياحة بتطلع باسمك و كمان انت اللى بتاخد التيبس غالبا ى الاخر من الزبون وو ممكن تبيع للزبون نوابير او شال سفارى او حتى سيم كارد شريحة موبيل . فخلى بالك هو شايف كل دا 

و كمان هو معاة العربية و التوصيل ليك _ على حسب سياسة كل شركة _و هو ممكن يخلى الزبون يتشققب ى العربية بسبب المطبات ويرخم عليك فى السرعة القانونية و توصل بكرا و كمان يصدرك مع الشركة لو فى مشاكل حصلت  و بيكون راتبة اقل منك و خبرة بالبلد اعلى منك و اماكن الفنادق او الرحلات  لانة نفذ عدد رحلات اكتر من و كمان بيعمل فى اليوم حوالى 5 ترانسفيرات فى البلد كل  يوم على الاقل و بيكون شايف الفرق ما بينك و بينة و دايما ى دماغة انة افضل منك فى الشغل بس ناقصة اللغة بس .

علشان تكسب السواق تعمل اية ؟

اسمع اكتر ما تتكلم _ اسمع منة و هتستفاد لانة فى الغالب اشتغل فى اكتر من بلد زى شرم او الغردقة او القاهرة _ هيحكى عن مواقف و هتتعم منة كتيير _  صاحبة لو تعرف مع رسم حدود _ لانك هتحتاجة بجد فى اكتر من موقف  و هحكيلك اكتر من موقف بجد ساعدنى السواق اكتر من صاحبى 

اول موقف كان و انا بنقل السكن لسكن تانى لوحدى _ قالى و الله يا مستر اخلص ترانسفيرة السفر و اعدى عليك فى البيت و ناخد حاجتك و نروح على السكن الجديد و كنت هلبس فى بتاع 100 جنية تاكسى و هرى _ بس هو اللى قدم المساعدة لواحدة لان فى علاقة طيبة و فى الخيرمعاة 
تانى موقف   ترانسفيرة وصول على الطيارة البيلاروسى راحت عليا نومة  و مسمعتش المنبة و هو اللى صحانى اساسا و صاحبى اللى معايا فى السكن نسى و مشى _ و الحمد لله عدت الترانسيرة بخير 
تالت موقف و دا بيتكرر كتيير لو انت واقف فى الطريق و هو شايفك و كان مشى هتلاقية وقفلك و قالك  انت رايح فين يا مستر  شيمى ههههههه  حصلت كتير معايا على ميدان السلام 

تالت موقف فى  سفر فلايت القاهرة  ملحقش الترانسفيرة قام السواق راح اخد الناس من على الفندق و المندوب اتكلم مع الزبون قبل ما يركب علشان يتاكد  انة هو اللى مسافر القاهرة من الاسم و الفندق و الاعداد  الراجل راح و لحق الطيارة 

رابع موقف بردو مع نفس الفلايت بس فى شرم عملو رادار و السرعة و احنا متاخرين فشخ و الناس فى المطار بتتصل و ضغط . السواق حل الموقف و ظبط مع المندوب ان اى غرامة من الرادار يدفعها المندوب . الراجل وافق و التانى شرخ و الحمد لله الطيارة لحقناها . فى مواقف اكتر و اكتر من كدا ممكن السواق ينجح الشغل اويوقف شغل .. و ممكن بسبب كباية نسكافية تقيدير منك بعد كدا الراجل يقف معاك فى بلاوى .

فى الاول انا قسمت الواقين نوعين بتوع  الشركة و بتوع السبلاير 

مع بتوع الشركة لازم تصاحبهم علشان انت معاهم طول اليوم لو مكنش النهاردة هتلاقية فى الشغل بكرا او فى الشغل فى رحلة معاك _ كدا كدا هتتقابلو كتيير _ يعنى من الاخر حرص اوى و متخصرش الناس على كلام تافة و هقولك زى اية دلوقتى 

الشركة قالت ان السواق ميوصلش المندوب للسكن بعد الشغل  او حتى الراجل عاوز يريح بعد اخر فندق او حتى علية كيلوهات زيادة و لو وصلك هيخسر فلوس من النقل او او او .... بلاش تكبر الموضوع   ب 4  جنية ميكروباص يحلو الموضوع و اشترى دماغك قولة بالله عليك نزلنى ارب حتى مواصلات زى ميدان السلام مثلا . الراجل فى الموق دا هيحبك علشان انت ريحتة بدل ما يروح الهضبة ويرجع تانى للجراج و يطلع تانى تشغلة بليل  تعب جامد _ هو هينزلك و يركن العربية فى اى جنب و ينام شوية . و انت ياعم تقف على لميان و تاخد حاجة ترجعك و خلصنا و يشلهالك بعد كدا . و الله لما بعمل كدا بلاقى هاى اس الشركة عربية تانية  طالع اهضبة و يوقف من غير ما اشاور و يقولى تعالى يا شيمى احنا طالعين الهضبة . ريح الناس تستريح _ السواق دا عمل لية كدا ؟ لانة من اسبوع انا عملت معاة نفس الموضوع دا و قلتلة انا راجع مواصلات مش مشكلة . فهمت الدنيا ماشية ازاى؟ لانك لو عندت هتتصل بالشيف جايد او ترانسفير و التانى يقوم متصل بمدير النقل و يقوم مدير النقل يقول للسواق ودى المندوب و عملت حوار و خصرت ناس كتيير اوى و انت اساسا دفعت ام ال 4 نية فى التليفونات بس اولا الشركة عرفت انك مش بتحل مشاكل و بتاع حوارات و كمان خسرت السواق و هيستنالك غلطة فى الشغل و يصدرك و هقولك ازاى دلوقتى  اصبر بس 

خليك برنس فى نفسك انت مندوب شركة و معاك لغة او اتنين يعنى على الرايق كدا و بلاش تكون ل 5 جنية تخليك تعمل حوار فى الحر على الفاضى . لما تكسب السواق هيرحك كمان فى ترانسفيرات ممكن تقع منك  هو اللى يشيلها و تمشى شغلك بالتليفون و من البيت و انا عارف بقولك اية و انت كسبان و مريح و هو بردو كسبان و مريح فى التيبس الكامل لية 

بالنسبة للسواق اللى جاى من السبلاير احتمال انك تقابلة فى الشغل كتيير مش قوى جدا بس خلى بالك لانة بيكون عندة تشغيلات تانية قبليك و بعديك و العربية راكبة على تارنسفيرة بعد او قبل كدا يعنى اتعامل معاة ميرى و اتاكد و اتصل قبل الشغل ااكد على الوقت و التجمع فين ؟ بردو كسب الراجل بس خليك متاكد انة مش هيخاف على الشغل لانة اساسا مش معاك  انت . يعنى العربية بتاعتة مش عليها لوجو اشركة و لما يدخل اى فندق و يشيل زباين سفر شركتك و انت مش موجود ممكن تتعكش جامد لان الهوتيل جايد ممكن يكون شايف و كمان اصحابك  .. من الاخر حوار و خلى بالك منة و اتعامل معاة ميرى شوية فى المواعيد و كمان هو فارق معاة الوقت لانة بعدك تلاقى عندة وصول فى المطار وعاوز يقلب السفر بتاعك دا بسرعة

بالنسبة لاشهر موضوع و هو يقولك يا مستر ظبطنا مع الزبون فى التيبس و انت لسه داخل  ماسك الحديدة و بتسمى و هتتكلم هتلاقية رازعك الطلب دا و رمكز معاك فى الكلام

لو فى اى ترانسفيرة انا مش بحكى اساسا فى حوار السواق بس بلعب معاة لعبة حلوة و بريح دماغى و بقولو فى اخر الترانسفيرة اشتغل على الزبون فى اشنط و هو هيديلك و انت ورزقك و انا مش عاوز منك حاجة اللى جايلك دا بتاعك انت 

انا كدا ريحت دماغى و هو ورزقة و اللى بيحصل لو مثلا ترانسفيرة سفر تاقية وصلنا قدام الجيت و نزلنا وهو يقوم واخد شنط الزبون ورايح معاة على البوابة لو الزبون فى نيتة يدفه هيسيبة لغاية البوابة و يديلو الدولار و لو مش عاوز هيقول لا و ياخد الشنطة من ايد السواق و خلاص _ فى الحالة دى انا مكسرتش قواعد الشركة و اهم قاعدة فى السياحة و شغل الترانسفير ان التيبس لا يطلب و لا يرفض و لو عاوز تعرف اكتر و الخلاصة من شغل الترانسفير اقرا الموضوع ا 

خلاصة الكلام فى شغل الترانسفير مان 

و لو ترانسفيرة وصول نفس الموضوع و هتلاقى دايما السواق كارة البيل مان بتاع الفندق لان الاتنين بيتخانقو على شنط الزبون انت يا معلم ريح دمغك و ركز على الزباين و خد الزباين و سكن و ريح نفسك و هاتلك 2  شاى او نسكافية و سكر و اطلع الى الفندق اللى بعدة علطول 

و لو فى رحلة بيكون فى اخر الرحلة فى تيبس دا غير الكوميشن من الفوتوجرافر _من الاخر راضى السواق _ ممكن يكون طماع شوية _ راضية بردو و دايما حطها كانها محبة و ربنا بيعوض علينا _ عدى اليوم و اطلع كسبان ناس و فلوس بدل ما تكسب فلوس و الراجل باصص فيها .

السواق الكبير فى السن بيكون احسن من الصغير لانة عندة خبرة اكبر بالبلد و يسعفك بسرعة و بيكون فاهم شغلة كويس و عارف اية اللى لية و اللى علية و التعامل معاة فى مقام اخوك الكبير او الوالد . لما الناس تشوف تعاملك رايق و مش بتزنقها على حد و فى نفس الوقت شغلك ماشى صح  يبقى تمام و اسمك بيسمع بسرعة و بتحبك الناس و كل دا بيبان فى كافيتريا المطار . هتلاقى الناس بتسلم عليك بمحبة و خير و لو فى شر او فى حد بيكرهك  هتلاقى اللى ينصحك بسرعة جدا و تعرف تلحق نفسك 

فى موقف حصل ان مندوب و سواق مسكو فى بعض بالايدى _ اوعى توصل للمرحلة دى _ الدنيا وقفت و الراجل عند لاى سبب من الاسباب و قل ادبة او ايا كان ما كان _ خلص شغلك و استحملة للاخر لغاية ما الزباين تمشى او الرحلة تخلص و بعد كدا انت ليك مدير و شركة و بهدؤ و برود جدا _ و متقطعش عيش حد _ خليك فى الصح دايما و الله اعلم بظروف الناس بس الاحترام دا خط احمر و قلة الادب خط احمر _ اى حاجى تانية بتتعالج _ 

زى مثلا سواق اتاخر و اتلكع و الترانسفيرة هتقع منك  و هو جنب الفندق تمام كدا:_خد تاكسى على الفندق و خلية يقابلك هناك و ميركبش الزباين لغاية اما توصل او يستنامك قام بوابة الفندق و بعد كدا  اعرف السبب لية اتاخر و امتحكمش من اولها 
لو هو كدا  يبقى تمام   خليها تيفونات ساعة قبل التواجد وتاكد علية و الخ الخ 

السواقين ليهم كبير دايما و بيكون اقدم واحد فى الشركة او اكبرهم سنا _ خلى علاقتك معاة كويس لانة ممكن يحل مشاكل بعيد عن المكتب

بص يا صديقى من الاخر كدا بالنسبة لشغل الارض و المكتب . لو انت فى الارض ترانسفير او تورجايد خلى تواصلك فى المشاكل مع المكتب اقل حاجة ممكنة 

لو انت فى المكتب  ك اوبريشن خلى شغلك فى تواصل مع الاتنين بس بيكون بمحبة و لغة تفاهم كاخوة و لكن فى نفس الوقت خليك ادارجى   يعنى ممكن تلزم حد بعينة بقرار معين !! انت مش صاحبهم  و فى نفس الوقت لازم تخلى الاتنين التورليدر او السواق يوصلو لمرحلة انهم عاوزين يخدموك بعنيهم فى الشغل و دى مرحلة بتوصلها مشش بالكلام الكتيير بتوصلها من مواقف و قرارات كل يوم

بمعنى بسيط لو السواق عرف انك تمام و راجل محترم و سمعتك كويسة و بتتعامل باخوة و مش بتيجى على السواق او المندوب هيحبوك و يشيلو الشغل . لان كدا كدا لازم يحصل دروب او تسقيطة فى الشغل و لازم حد يشيلك علشان كدا خليك معروف انك بتاع شغل و بتاع حقوق .

السوق الصغير فى السن اللى هو فى سنك فى اولمرة بيشوف انت نظامك اية ؟ تنك او مش بتاع شغل او ملكش شخصية المهم انة بيجس نبضك انت الاول . لقاك راجل و جدع يخلى الشغيلة حلوة و يراعى الشغل و تتصاحبو _ خلى بالك من ناحية مهمة نفسية جدا _ انت و هو فى نفس العمر تقريبا الفرق ما بينك و بينة ان انت عيلتك و ظروفك ساعدوك تبقى فى المكانة دى و هو ملقاش كدا  بلاش تناكة و رخامة فى الشغل و افهم نفسية اللى قدامك  و راعى ربنا ى المعاملة و الشغل .

ممكن تلاقى سواق و انت ماشى قام مشغل التشجيل مهرجانات او قافل التكييف او مقلل السرعة او عمال يلبس مطبات او كشر كل دا معناة حاجة واحدة بس ان العيب من انت مش منة هو .. اسمع منة و اطلب بكل ادب اللى انت عاوزة منة و الدنيا تمام و مش هيحصل مشاكل تانى 
اسال السواق على الاسعافات الاولية معاة حاجة فى العربية شاش اوقطن او بيتادين و بالذات لو طالع رحلة . لو حابب تعرف اكتر عن اهمية الاسعافات الاولية فى الشغل   اقرا الموضوع دا 

الاسعافات الاولية و أهميتها للتورليدر و التورجايد

موقف عن شغل الميرى  فى الشغل 

كان فى استقبال و معايا تشغيلة هاى اس و العدد 10 باكس و الشنط لازم تترفع على العربية و مش هتدخل جوا . السواق  مش عاوز يرفع الشنط على سقف العربية . و الحمد لله علاقتى بالسواق كويسة و فى اليوم دا الشيف ترانسفير و مدير المطار و اللى ما سك البارك واقفين على استقبال الطيارة دى . حوار اين 60 فى 70  . كلمت ابو حميد قلتلو صلى على النبى . الدنيا شادة على الفاضى . تعالى نعدى النهاردة  على خير و انا رايح الكافتيريا اجيبلك كباية شاى علشان و تعالى نشرب سيجارة حلوة قبل ما الطيارة ما تنزل 

مكنش يعرف ان التشغيلة 10  باكس ههههههههه  الهم كلمتة و فهمتة انت فوق و انا تحت و انا ارفعلك الشنط و نعديها و علشان افهمك هنا ان السواق ذكى جدا  سال قالى يا  شيمى هو فى اطفال ما هو ممكن نظبطها . فهمتة ان المشكلة مش حوار اطفال و نكسب الكرسى  و الشنط تكون فى العربية و منرفعش حاجة على السقف . فهمتة ان كل الشركة موجودة و  زى ما انت شايف احنا مش صغيرين نسمع كلمة ملها ش لازمة من حد . و انت عارفنى انا على اية مش بتاع حوارات و كدا . المهم عملنا كدا و رفعنا  خلصنا 

الاسبوع اللى بعدية نفس الحوار  بس محدش كان موجود و نفس السواق . قالى  شيمى   يالا نقلب التشغيلة _  انا فى المواقف دى علطول  معاك مبجليش _طلع فى التشغيلة طفلين و الدنيا كانت سهلة و الشنط مش كتيير و كبس فى العربية و تحت الكراسى و مرفعناش حاجة و لغاية دلوقتى هو فاكر الموقف دا . و من عارف ان الشغل بيحكم بس عارف انى مش برخم فى الشغل .

اكتر حاجة تضايق سواقين الهاى اس او الكوستر الشنط لانة هيقولك واحد طلع فوق و ضهرة مش عارف حصلة اية و راح مستشفى اية ؟هيدخلك فى حوار ... انت سيطر على المحادثة 
فى ترانسفيرة السفر امشى على الشيت فى ترتيب الفنادق و لكن فى الوصول ادى السلطة للسواق هو اللى يرتب . اديلة المساحة فى 

الشغل و هو هيريحك على الاخر .

و انت بتستلم الشغل لازم تشيك على لعربية نضافة  و تشوف شكلها ازاى من جوا من غير ما تحسس اسواق انك بتشيك و لواتوبيس اتمشى جواة كدا و لو سفر باتوبيس  لازم تشيك بجد علشان لوزبون نسى حاجة مثلا و لو جاى من رحلة بردو شيك على العربية قبل ما تخلص الترانسفيرة و لو انت مع سواق سبلاير   شيك على السفر بالذااااات علشان لو حد نسى حاجة فى العربية هيتصلو بيك و انت  

هتتصل بالسواق و السواق اكيد فى تشغيلة وصول  .. اهم حاجة تانى تشيك على العربيات فى السفر 

و انت فى الوصول  اول ما الزباين ما بتطلع من الجيت  بتقول للسواق يشغل التكييف العربية و لو انت معاك برايفت ترانسفير فى عربية ليموزين فى الغالب بيكون فى ازاة مية لكل شخص و فى الغالب بيسيبها فى العربية لانة رايح الفندق سيبها للسواق و عديها عادى جدا 

الحمد لله اعتقد كدا انا كتبت ازاى تتعامل معاهم صح و بالتوفيق للجميع 

احمد الشيمى