ترانسفيرة السفر زى الكتاب مابيقول 

ترانسفيرة السفر 

 

هنتكلم النهاردة بالتفصيل بخصوص ترانسفيرة السفر و ازاى تعملها صح و نعرف  المسؤولية الكبيرة فيها اية

الفرق بين السفر و الوصول انك مش محتاج تعمل تارجت حضور الزباين للشركة و علشان كدا بتكون سهلة فى السبيتش بتاعها جدا بس الترانسفيرة دى مسؤوليتها اكبر بكتيير من الوصول لية؟

علشان لو انت جليت او مركزتش فى الشغل هيشيل تذكرة طيران السفر للزبائن و كمان إقامتهم لغاية ما يسافرو؟؟ اةة هتشيل و تبقى مشكلة كبيرة و هقولك ازاى تأمن نفسك فى الشغل صح  بالخطوات دى

تعالو كدا واحدة واحدة نفهم اية المطلوب مننا بالظبط و نفهم الموضوع قبل ما نحفظة

عادة السفر بيكون راكب وراة ترانسفيرة وصول و دا الموضوع اللى جاى ان شاء الله

انت فى الاول تعرف السفر على طيارة اية ؟ روسى او كازاخى او اوزبيكى او ايطالى ايا كانت البلد

و تعرف رقم الفلايت بتاعتك علشان تعرف لو فى تأخير فى السفر  متتطلعش بدرى_ دا بيكون عادى شغل اوبريشن  فى الشركة و الحركة كمان علشان ينسق مع النقل

بلاش تثق ثقة عمياء فيهم . شوف شغلك صح و تابعة و خليك دايما سابق بخطوة و هتعرف دا من على ابليكيشن فلايت رادار او حتى من موقع خط الطيران

لانة عادة الطيارة بتكون جاية وصول و بعدها سفر على نفس المطار و بالتالي هم بيتاكدو ان الطيارة سافرت اساسا من بلدها بالزباين لو الطيارة مطلعتش من هناك فى ميعادها او عملت تأخير سفر ٤ ساعات مثلا .. بالتالي السفر من مصر هيتاخر بردو نفس المدة .

و كمان تعرف فى شغل تانى يوم من الشغل بتاعك على الشيت او ابليكيشن الشركة انت معاك شغل سفر فى وصول او سفر بس و تعرف شغل تانى يوم و كمان مع السواقين و العربية اللى هتنفذ معاك

لو السفر من نفس البلد تمام _ يعنى هتسفر من فنادق شرم مثلا _ تمام كويس جدا < لكن لو هتسفر من دهب على مطار شرم خلى بالك من التصاريح و التعويضات تكون معاك قبل ما تطلع

و لازم تعرف انت طالع سفر مع زبائن  معاها خدمة قى المطار  عادة بيكون برايفت _ بيتعامل  فى اى بى علشان يسجل و يوزن من غير طابور على الكونتر بأنك فى الحالة دى هتتابع مع كرو المطار و هيكون مستنيك قدام الجيت بتاعت الصالة

علشان يستلم منك الناس و يعملهم الإجراءات بسرعة  و ميستنوش

بعد ما تعرف كل دا و تكلم السواق و ترتب معاة التواجد _ يعنى يستناك فين علشان تطلع و تنفذ الشغل _ و تطلع على أول فندق فى ميعاد تسفيرك

عادة احنا بنصحى بعض و بناكد بالتليفون علشان ممكن يكون التواجد قبل الفجر مثلا و تتأكد ام السواق فى الطريق

اية اللى لازم يكون معاك و انت رايح تنفذ السفر بتاعك

اولا و أهم حاجة الرسالة و متصورة اكتر من نسخة

Transfer no show message 

ثانيا تكون عارف رقم تليفون الهوتيل جايد بتاع كل فندق

ثالثا تكون عارف مطار السفر بتاعهم _ مطار ١ او مطار ٢ و دا بيكون معروف مع الوقت و اللى بيتغير رقم الكاونترات السفر

تعالو نشوف السيناريو دا كدا _ عندك سفر على طيارة  بيلاروسيا من ٤ فنادق ٢ فى الهضبة و ٢ فى نعمة واولهم  الساعة ١:٣٠ بليل مثلا

الاوبريشن مهمتة الأساسية التوقيتات و دى اهم حاجة بالنسبالك يعنى بيحط تواجد قبل الترانسفسرة ب نص ساعة مثلا و كل فندق بيجيلك ١٥ دقيقة للزبائن و كمان بيحطلك  و بيحسبلك وقت المسافة من فندق للفندق اللى بعدة

يعنى اوق فندق ١ و نص و التانى الساعة واحدة ٤٥ دقيقة لأنهم جنب بعض مثلا و العدد  با يتعدى ال ٦ باكس

بس فى نعمة رامى الفندق التالت الساعة ٢ ونص لانى بيعمل حساب المسافة و كمان بيديلك وقت للطوارئ اللى هنتكلم عليها بردو

و الفندق الرابع هتلاقيه الساعة ٣ بليل مثلا و دا آخر فندق ليك و بعد كدا على المطار

فى الواقع انت بتظبط مع السواق تتقابلوا  قبل ميعاد الفندق بربع ساعة مثلا و تطلع فى توقيتك على هناك اول فندق مع العلم ان التواجد معاة قبلها بساعة مثلا

دا واقع و بيحصل بالذات فى ضغط الشغل أن مقلكش اقابلك فى الطريق او اقابلك هناك على حسب الظروف و خلى بالك طالما انت طالع مع سواق الشركة الدنيا كويسة شوية لكن لو مع سبلاير  لازم  تضغط علية ييجى بدرى لانة لو اتجلت منة الترانسفيرة انت اللى هتلبس لان المفروض تبلغ على ميعاد التواجد انة مجاش _ من الاخر لو شواق انت عارفة و عارف شغلة يبقى تمام لا ضرر ولا ضرار _ مش عارفة خليك ميرى فى الشغل احسن

 -خلى بالك انت مع الوقت قلبك هيجمد و ممكن  مترحش اساسا السفر و السواق معاك على التليفون و خلص الموضوع -حالات استثنائية

المهم ركز فى الكلمتين دول هتلاقى السواق بسألك على العدد فى كل فندق و انت مش فاهم لية ؟

علشان متركبش حد مش شركة تانية و تاخد منة فلوس مثلا و السواق مش عارف

لانة و انت مثلا فى اول فندق ركبت زباينك و لقيت زبائن تانية من شركة تانية متأخرين و مركبوش مع شركتهم و مش عاوزين تاكس و اتكلم معاك خدنا و نديلك ٥ دولار و انت ركب يا معلم و السواق مش فاهم بس هو عارف العدد

المهم و صلنا اول فندق فى ميعادنا و الناس مش موجودة . انت معاك الفاملى نيم و معاك  عمر كل زبون يعنى انت داخل الفندق شايف ان معاك واحد و مرآتة و عيلين  داخل بتدور على دول _ فى الزحمة هتفرق معاك اوى عمر الناس اللى مسافرة علشان تنجز فى الشغل

المهم ملقتش الناس اسأل علطول الريسيبشن/البيل مان / الكونسيرج   لانة عارف الغرف المسافر و كمان لازم يشيك على الغرف لو حاجة اتكسرت او اتسرقت و الناس تسلم المفاتيح بتاعتها و يحضنو بعض و نركب و ننجز فى ام السفر دا

قالك الريسبشن الناس دول مبلغين انهم هيمشو مع نفسهم

عادة كلامة هتمشى انت كدا ؟

أمن نفسك من ام حوارات الشغل و اكتب  رسالتك الجميلة انك جيت الساعة كذا و لو ينفع تتصل تمام مردوش مفش مشكلة و اكتب مشيت الساعة كام و مضى الريسيبشن و اكتب فى الرسالة رقم تليفونك و تليفون حد من كرو المطار و كمان اكتب اخر ميعاد يكونو فية هناك فى المطار امتى و كمان رقم المطار السفر اللى هيسافرو منة و بلغ قبل ما تمشى الهوتيل جايد لو الفجر مثلا اكتب على الواتس و اكتب فى جروب الشركة و كمان سكان الرسالة دى و ابعتها على جروب الشركة و بلغ الكرو بتاع المطار علشان يكون عارف لانة معاة ليستة الطيارة

تمام كدا خلصنا و هتمشى صح ؟؟؟ عيب عليك لازم تسأل بشياكة الريسيبشن فين البريك فاست بوكس بتاعنا انا ز السواق  يا عم و انزل اعملك ٢ شاى او نسكافية __ مترخمش فى موضوع الاكل خدها بشياكة لانة ممكن مفيش بجد فى الريسيبشن زيادة عادى جدا بسبب ان المطعم الفندق عمل بالظبط على العدد

 كدا احنا ماخدناش حد من الفندق دا و طالعين على الفندق التاني فى ميعادنا و دخلنا و السواق ركن فى الباركينج و انت داخل الفندق  التانى عارف العدد و السن بس عينك جت على شنط قدام باب  الفندق كدا خير يا مسهل بتنادي على السفر ازاى بقا ؟

بتقول اسم شركتك و بعدها كلمتك ايربورت

هاتلاقى ناس حواليك و فى منهم بيستعبط و مش سامع كويس و هو اساسا طالع رحلة مش سفر و فى منهك من شركة تانية و عاوز يركب و خلاص او حتى فى منهم هيسافر مع زميل ليك او طالب خدمة ترانسفير انديفيدوال و مش معاك فى الاتوبيس و فى كمان ممكن يكون مسافر على بلد تانية مش نفس طيارتك

إللى عاوز اقولة انت لو قدام الاتوبيس و الناس هاجمة عليك اثبت مكان قدام باب الاتوبيس و شوف كل واحد من الأسماء اللى معاك تمام علم علية و أسألة فين شنطتك؟ و خاية يحطها فى الاتوبيس

فى ناس اول مرة  و مش فاهمين انت اول ما تعرف ان الزبون دا معاك قولو وش شنطتك و حطها فى الاتوبيس و هتلاقى السواق معاك و الناس بتروح علية علشان تحط فى الاتوبيس الجنب اليمين أو الشمال ايا ما يكون

المهم لاقيت الناس كلها تمام و العدد صح تمشى على كدا؟

لا خليك فاهم فى الشغل ادخل على الريسيبشن و فهمة انك هتتحرك لية؟

فى زبائن جريت و مسلمتش المفاتيح او فى زبائن كسرت حاجة فى الغرفة ؟

المهم الراجل يقولك الأوكية تمام اطلع الاتوبيس و عد الناس و أكد عليهم مفيش حد ناسى باسبور  او اى حاجة ؟  كل واحد حط الشنط فى الاتوبيس؟ تمام  يالا بينا

نطلع على الفندق التالت و متأخرين شوية  المهم و صلنا الفندق التالت هنا بقا انت معاك عدد حوالى ٢٥ باكس و فيهم أطفال و رضع و  حوالى داخلين على ٨ غرف

نفس الدخلة و نفس الكلام و فلترت الزباين بالاسماء بس فر غرفة مش موجودة

هتدخل الريسيبشن و تسلم على الراجل و صباح الفل و الدنيا و تقولة فى غرفة ناقصة باسم كذا  رقم الفوتشر هيكون معاك

المهم جابلك الرقم و اتصلت بيهم لقيتهم صاحيين بس  هتعرف الزبون بنفسك و انت مستنية  من بدرى و تعرف لو طالع معاك لازم يحضر دلوقتى

المهم لو معاك وقت ربع ساعة قولة ١٠ دقايق و اتحرك و لو مش معاك وقت فهمة انك مستعجل جدا علشان عندك ٣ فنادق و لازم نلحق المطار .

كل دا علشان لما هو رد عليك..انت علشان تسيبة و تمشى دى مش سهلة خالص  خلى بالك فى حالات معينة تسببة و تمشى لما ياخرك على الفندق اللى بعدك ب ١٠ دقايق كدا لا اتصل بالهوتيل جايد و صحية و فهمة انك لازم تتحرك _ فى الوقت دا انت مش قاعد ساكت انت اولا تطلع على الاتوبيس تأكد على العدد و انهم مش ناسيين الباسبورات و نفس الكلام الفندق اللى فات خلى السواق يقفل باب الاتوبيس

ايوا زى ما بقولك كدا لية ؟ علشان لو اتاخرت اخر غرفة و انت هناك على الريسبشن مستنى ومش شايف الاتوبيس وحد نزل و انت مش شايفة وراح الحمام و انت اتحركت تبقى لبست جامد ؟ ازاى تمشى و الراجل ركب و حط الشنط المهم هتلف حوالين نفسك و مش هتكون مسيطر على الناس علشان تنجز

لو السواق واقف مع الناس و بتشرب سيجارة عادى كش مشكلة و لو مقفلتش الباب يبقى لازم تعد كل الاتوبيس قبل ما تتحرك من الفندق التالت و تتاكد ان كلو موجود

الناس جت تمام كدا و اخدت الوجبة بردو و السواق فرحان و انت كمان و امنت على الفطار

اطلع على الفندق الاخير ة انت داخل علية متأخر  ربع ساعة

عادى طالما اخر فندق،جمد قلبك يا وحش _ بس عادة فى التأخير هو اخرك ١٠ دقايق ربع ساعة

المهم معاك حوالى ١٠ غرف ٧ موجودين و فاضل ٣ غرف

إتصلت  بيهم واحدة منهم واخدة تاكسي مع نفسها _ كلام جميل عرفها رقم المطار و اخر ميعاد تكون هناك و اكتب الرسالة او املى الرسالة و مضى الريسيبشن او الكونسيرج عليها

الغرفة التانية جت و عليها فلوس و مش عاوز يدفع و الريسبشن مش عاوز يستلم المفتاح او حتى يمشى الزبون

فى الحالة دى خليك من بنها بس تكون فاهم الحوار على اية ؟

الزبون كدا كدا هيدفع لو التكلفة عالية بأن الفندق مش هيعمل تشيك اوت بس ساعات بيكون علية بتاع ٢٠ دولار و مش معاة غير ١٥ دولار

خليك بعيد بس اوعى تركب الزبون فى الاتوبيس علشان انت متدخلش فى مشكلة مع الفندق

من الاخر يا صديقى انت و الريشيبشن كل يوم فى وش بعض رايح جاى علية و على الناس و الزبون دا مرة وماشي

متخسرش حد و فى نفس الوقت شوف شغلك _ لو الريسبشن مش عارف يتكلم مع الزبون ترجم للزبون و خليك هادى و اخلى مسؤليتك و بردو فهم الزبون دى فلوس الفندق و لازم تدفع و كمان الريسبشن دى مسؤولية علية و على الهادى

المهم الزبون مش معاة غير ١٥ دولار و الريسبشن قافش  .كلم الريسيبشن بهدؤ و فهمة ان الراجل مش معاة بجد و خلية يشوف حل او يكلم الفرونت مانجر مثلا

المهم تكون وقف للآخر لغاية ما تاخد الزبون معاك طالما اخر فندق و التأخير مش معدى ربع ساعة لو وصلت لل ٢٥ دقيقة صحى الهوتيل جايد و فهمة الموضوع

الغرفة التالتة اساسا مش موجودة فى مصر لانة كان نو شو و المكتب الاوبريشن فى العسل و مش عامل ابديت على لستة الطيارة و انت عمال تدور مع الريسبشن بالاسماء و رقم الفوتشر و مفيش حد

لو انت فاهم هتعمل اية ؟؟ هتقول للريسبشن هات اوت النهاردة صورة منة كلة

ورقة كدا مكتوب فيها الغرف اللى هتعمل اوت من الفندق و الفاميلى نيم علشان تأمن نفسك لان الريسبشن لو بيتدرب  او حاجة متلبسش انت اساسا

المهم انت واقف لقيت زبونين بيكلموك و خايفين الطيارة تفوت عليهم و عاوزين يركبو معاك و دا آخر فندق و انت معاك كراسي فاضية فى الاتوبيس

و الناس هيدفع ليك فلوس حوالى ٢٠٠ جنية مصرى و دى اخر فلوس مصرى معاهم و الهرى دا

المهم كلم السواق هيقولك يالا بينا موافق _ حاسب الناس قبل ما تطلع الاتوبيس لانة هناك فى المطار مينفعش يديلك فلوس كدا و ممكن يقولك اللى عندك اعملة و تلبس انت مع السواق

و انت قبل ما تتحرك على المطار عد الناس مرة تانية _ ادخل كدا لغاية اخر الاتوبيس و عد فى سرك الناس و اتأكد من العدد كدا انت يعتبر خلصت ٧٠% من الترانسفيرة و فى جزء مهم جدا

انت بتكون عارف كل طيران بيشيل كام كيلو مانجو على الطيارة لأنك خلاقي الاتوبيس قلب مزرعة فواكه  علشان هتتسال فى الحوار دا

انت خليك فى السليم و تطلع تبلغ اننا طالعين على المطار   هنوصل فى خلال ١٠ دقايق و تقول رقم المطار ١ او ٢ و ورقم الكونترلت بتاعت السفر و تأكد عليهم أن محدش ينسى حاجة فى الاتوبيس و دى اهم نقطة  علشان متلفش حوالين نفسك  بعد الترانسفيرة

و كمان تتكلم ان فى شيالين الشنط و دا بيكون بفلوس و تفهم الناس متدفعش اكتر من دولار و كمان لو عاوزين التروللى دا ببلاش لو عاوزين يستخدموة بنفسهم .

وتتمنى ليهم رحلة آمنة و الهرى دا كلو . عادة ترانسفيرة السفر

 مفيهاش كلان كتير لان الناش اساسا مسافرة مش واصلة مش مطلوب منك حد يحضر فى مييتنج او تبيع لحد رحلة او اى حاجة

الناس ماشية و خلى بالك لان منهم عاوز يغير عملة الجنية  المصرى و مش عاوز يسافر بية  ممكن تساعدة لو حابب و تديلو دولار او روبل على حسب بلدة

السواق هيقولك قولهم على التيبنج _ متتكلمش فى حاجة و ريح دماغك لان على حسب الزبون و دا باختيارة مش غصب عنة بس بردو متخسرش الراجل اللى معاك و قولو لو عاوز حاول حاول تساعد الزبون اللى ورا دا _ انت شايف أنة زبون ممكن يدى تبس و دى بتيجى مع الخبرة_ ساعدة فى شيل الشنط مممكن يساعدك ز انا مسامحك يا معلم فى التيبنج _

وصلت المطار و الناس بتنزل انت ابعد شوية و اطلع على الرصيف و السواق هيروح يفتح للناس الشنط علشان ياخدوها و تكون باصص على الاتوبيس و الناس نازلة و رحلة سعيدة و الهرى دا كلو

الناس مشيت و داخلة على الجيت  هاا تمشى بقا ؟ لا

اطلع الاتوبيس و اتأكد أن محدش نسى حاجة فى كل الكراسي لغاية الكنبة _ مفيش حاجة تقدر تتحرك

لو سيناريو الناس نسيت حاجة جاكت او شنطة هتلاقى كرو المطار بيكلموك انت فين فى كذا كذا و انت تقوم مكلم السواق هات الحاجة بسرعة و تجرى على المطار علشان تسلمها وتخيل ان النقل كان ساعتها سبلاير ممكن متعرفش توصلة بسرعة از يكون خرج من المطار بسرعة و تجرى وراة ودى مسؤوليتك انت

حاول متخليش كواليتي الشركة او حتى الشيف ترانسفير او اى حد يعدل على شغلك _ الشغل سهل عاوز دماغ صاحية بس و احنا مش شغالين فى علوم فضاء او حاجة محتاجة معدل ذكاء خارق يعنى _ الموضوع فهم قبل ما يكون حفظ و كمان إدارة موقف صح و إدارة بشر كمان

فى حالة السفر من دهب مثلا نفس الكلام بس الفرق فى  التصاريح و تبلغ فى شرطة السياحة هناك ويكون معاك أوراق الشركة مختومة و كل حاجة تمام

فى حابة تجميع رحلة سفارى مثلا او القاهرة برى او جوى او بتجمع بحر نفس الكلام بالظبط كانك بتسفر بس خلى بالك جدا انت مينفعش تتحرك من غير حد غير لما تكون مبلغ الهوتسل جايد ١٠٠% لازم يكون عارف قبل ما تتحرك و طبعا رسالتك الجميلة   طيب لية ؟

لان الزبون شارى الرحلة و الهوتيل جايد بايع و كوميشن و لو مطلعش هيتشاكل معاة الزبون . مهم جدا النو شو فى الرحلات صدر علطول الهوتيل جايد اللى بايع او الهوتيل جايد بتاع الفندق دا و أأمن نفسك علطول

فى حالة سفر القاهرة برى و انت بتجمع خلى بالك من مواعيد الكانفوى و الوقت ميتسرقش منك _ علشان  المواعيد مهمة جدا للخروج من شرم 

المفيد :

·         اهم حاجة قى السفر ترتيب الفنادق _ اوعى تشغل دماغك لو انت شايف ان الترتيب غلط و تعدل انت ترتيب الترانسفيرة علشان كل فندق لية ميعاد معين على عكس الوصول مش فارقة اوى و دى بتاعتك عاوز تخلى ضهر المطار الأول و بغد كدا غرقانة و ترجع ماشى عاوز تخلى غرقانة الأول و بعد كدا ضهر المطار ماشى ..مش فارق لا ترتيب و لا وقت

·         فى السفر مش فارقة الشنط على اليمين أو على شمال الاتوبيس لان اول ما نوصل المطار الكل مرة واحدة هياخد الشنط لكن فى الوصول تفرق مع السواق علشان ميفتحش يطن الاتوبيس كلها قدام الفندق علشان غرفتين بس و شنطهم _ و انت فى الوصول هتلاقى السواق بسألك على كل زبون رايح فين علشان شنط كل فندق تكون فى مكان معين على الشمال او اليمين

·         بلاش تستخدم رصيد الستر من ربنا على الفاضى _ يعنى متحاولش تقضيها نوم و السواق يطلع يعمل السفر و انت نايم لانة فى وقت الجد انت اللى هتشيل المشكلة يعنى ممكن تعمل الحوار دا فى عربية هاى اس مثلا و انت مسفر الناس و معندكش وصول تاخد الناس و تتأكد من النو شو و تمام و تنزل فى نص الطريق و السواق يكمل على المطار _ ينزلك على ميدان السلام قى شرم مثلا و هو يكمل على المطار و خلصنا

·         الرسايل اللى عملتها نو شو والورق مترمهوش غير لما اليوم يخلص و يكون عندك على الموبيل علشان لو كرو المطار كلمك بغد ٣ ساعات يأكد على ناس ركبت او لا تقدر تراجع من الورق و تعرف كام واحد نو شو و من فنادق اية

·         العيال بتوع التروللى اللى قدام المطار خلى بالك منهم علشان بيخطف الزبون و هو نازل و بيفهمة انها إجباري و لو زبون حنبلى هيعمل مشكلة و انت كنت فين و بلا بلا بلا

·         خلى بالك من الزبون اللى يكون مع زميلك فى نفس الطيارة بس مش فى  الترانسفيرة بتاعتك انت لية؟

عادة الزبون دا واخد ترانسفيرة انديفيدوال و دافع فر الفوتشر بتاعة كدا و هو عاوز يركب معاك و انت معاك مكان فاضى ؟

اولا فهمة ان زميلك هتيجى فى ميعادة و لو عند اتصل بزميلك و اعرف متأخر لية ؟ طبعا انت مستغرب لية مش عاوز اركبة صح ؟

اللى بيحصل ان الزبون لما يوصل المطار هيعمل مشكلة انة عاوز يسترجع حق ترانسفيرة السفر البرايفت و تكون عادى و كمان يضر زميلك و يضرك لأنك مبلغتش ؟ طيب الحل اية ؟

الراجل لو رايق هات ورقة بيضة و كتبة بخط ايدة انة اللى طالب كدا و عاوز يركب معايا بإرادتة و ان ميعاد الترانسفيرة بتاعتة لسة مجاش بس هو اللى طالب كدا يركب معايا فى الاتوبيس

·         فى حالة ان الترانسفيرة اتاجلت و الطيارة هتتاخر و انت ركبت فنادق.  لازم تتصل بالاوبريشن علشان يأكد عليك تكمل و لا ترجع الناس ..علشان اكيد الهوتيل جايد بلغ الفنادق بتاعتة التانية مثلا ان الميعاد اتأجل.  هتروح الفندق و مش هتلاقى حد و هنقعد تدور على الناس لانة رجعت تانى الغرف و الناس اللى فى الاتوبيس معاك هيزنو و اللى عاوز يريح ز اللى عاوز الحمام و اللى قاعد فاضى يسألك أسألة وجودية و هرى و السواق عندة ترانسفيرة تانيةو لو كان سبلاير يبقى كملت _ الحل الصح بلغ الاوبريشن علشان يأكد عليك ترجع الناس و لو الناس كلها معاك ممكن يقولك ارمى فى المطار بس اتحرك براحة _ اتلكع من الاخر و حاول توصل متأخر شوية.

·         اخيرا . خليك واثق من نفسك و متخفش انك تاخد قرار و متخفش من حد طالما انت شغال . و ابعد عن الشو فى الشغل.  و افهم ان شغل سياحة اهم حاجة فية الوقت و الزبون ..الخبرة هتيجى من الشغل بس طور من نفسك فى كل حاجة . مش بقولك سوق الاتوبيس بس على الاقل اعرف الزرار اللى بيفتح الباب و اللى بيقول الباب . دايما تكون عارف الفنادق اللى فتحت او اللى قفلت . ومتركزش مع اللى يحسسك انة بوشكين فى الروسية ولا طة حسين فى العربى .. كان قدم فى الخارجية احسن له ههههه مش معنى كدا اى كلام..طور من نفسك دايما فى اللغة بس متعش الدور على الناس..خلى على الهادى و لو عاوز تعرف اهمية اللغة فى شغل التوليدر انصحك بقراية الموضوع دا

هل اتقان اللغة اهم حاجة للتورليدر او الجايد فى الشغل؟

·         اوعى تكلم المكتب علشان يشيل من عليك تشغيلة الا فى الظروف الطارئة.  انت راجل بتاع شغل و لو شايف الدنيا جاية عليك دور على شغل و انت شغال . ربنا هيكرمك و تتعجب  من كرم ربنا لأنك مش بتضر حد و بتشتغل وبس

·         الكل بيستسهل ترانسفيرة السفر مع العلم مسؤوليتها تقيلة جدا و لو جليتها مشكلة للشركة..لكن لو جليت الوصول ممكن  تتلحق اى حد فى المطار فاضى هيعملها او حد يعمل انفو فى العربية اول ما تكمل و يبعت السواق يسكن الناس و لو حابب  ترا موضوع خلاصة الكلام فى شغل الترانسفير مان انصحك بقراية الموضوع دا

خلاصة الكلام فى شغل الترانسفير مان .

·         لازم تكون عارف مين بيسفر معاك على نفس الطيارة لانة فى الغالب هترجعو مع بعض  لما توصلوا المطار لو ممعكوش وصول و تعرف مين السواق اللى هيخرج من المطار علشان تركب معاة و تنزل على السكن و بردو علشان لو حصل مشكلة تقدرو تحلوها بسرعة و يكون قريب منك او انت ممكن تساعدة 

·         لازم تتعامل مع سواق السياحة صح و تفهم عقليتة و تكسبة بدل ما تخسرة و لو حابب تقرا اكتر فى الموضوع دا انصحك تقرا المقال دا

 انت كمندوب ازاى تتعامل مع سواق السياحة فى الترانسفير او الرحلة !

·         اصعب تسفيرة بالنسبالى كانت و احنا بنسفر الاوكران بعد الازمة بتاعتهم مع روسيا و الناس عاوزة تمشى و تسافر و الكل على اخرة و كا الاوكران على طيارة واحدة مسافرة و كمان كنا حوالى 4 اتوبيسات مع بعض من نفس الفندق كانت رخمة لان انت معاك اتوبيس و الناس عاوزة تطلع و فى 4 اتوبيسات واقفين رة واحدة و عاوزين نركب بالفاميلى نيم  كانت بهدلة اكتر من 200بون بشنطهم و عيالهم و عاوزين يركبو مرة واحدة و كمان الزبون دا عاةو يركب فى نفس الاتوبيس مع صاحبة او العيلة التانية و الاتنين فى اتوبيسين مختلفين و الناس على اخرها كان مولد الصراحة بس اللى اتعمل ان اخر اتوبيس طلع متاخر عننا علشان يتاكد لو فى حد سقط من اى اتوبيس يتلم فى الاتوبيس الاخير و دا كان القرار الصح

بالتويق للجميع 

احمد الشيمى